ضغط عصبي

أول مرة فى حياتي أعرف معنى الضغط العصببي اليومين إللى فاتو

طبعا الواحد بيحمد ربنا فى كل حال ولكن لازم الإنسان بيمر بأيام أنتخة وأيام مفشـ ***ـ

الموضوع بسيط رئيس الحسابات عندنا فى الشركة (شركة المفخد للنفيخ والمحبطات) أو شركة (الموفق للياميش والمكسرات) لامؤاخذة فى الكلمة دخل دنيا أو بمعنى آخر خرج منها :)

وأصبحت بعمل شغلي وشغله ده بالإضافة إلي إن مدير الإدارة المالية عندنا منفخ عليا وعلى كل إللى تحت إدارته بشكل مبالغ فيه جدااااا وإللى يجنك إنه كول اليوم ماسك الأيباد وعمال يلعب عليه وف الآخر يتنرفز عليك عشان شافك بتتكلم وإنت شغال (حظه إني بطلت أشتم) حسبي الله ونعم الوكيل

إسلام بقى كان عامل فرحه فى قاعة سيستا فى محرم بك والعبد لله الحمدلله نعمة وفضل مش بحضر أفراح فى قاعات وطبعا ما سلمتش من الحلويات واللذاذات والظرافات بتاعت زمايلى فى الشركة تاني يوم على غرار

إيه يا شيخ ماجتش إمبارح ليه ؟

فيرد عليه واحد أكثر لذاذة أصل الأفراح حرام يا عم والشيخ مش بيحضر

وإللى يبصلك ويبتسم أوي مش عيب ماتجيش فرح زميلك فى الشغل ؟

وكان ردي بكل بساطة أنا لبحضرش الأفراح فى قاعات ومش بحبها أصلا والحمدلله حضرت كتب كتابه فى المسجد 

سيبكم من الهرى ده المهم أنا دلوقتى إتنفخت جدا من شركة المفخد دي وربنا يكرم بمكان تاني الواحد يؤدي فيه وظائف محددة إنما إنك تعمل خمستلاف حاجة فى الدقيقة ده كده عاوزين حد من السيرك القمي بالعجوزة مش محاسب

أنا بعت مسج على الفيس لصديق ليا إسمه علي لسا مسافر ليبيا قريب وكان قايلى إنهم عاوزين ناس هناك وهو مرتاح فى الشغل وبيقولي الظروف تمام والناس هناك كويسة جدا فربنا يسهل ويكون فيه حاجة خاصة وإن ظروف البلد حاليا لا تبشر بالخير على المدى القصير ويمكن ربنا ينفخ فى صورتها بعد حوالى 10 20 30 سنة

وأخيرا بصبح وأمسي على أخويا إسلام وبقوله كل سنة وإنت طيب وعقبال 100 سنة وماتنساش لما ترجع من أجازة الجواز علبة بسكوت أهلاوي وكوباية الشاي باللبن إللى بتغرق بيها هدومك ومكتبك يومياً

:)